Беларусда минсклик Андрей Зельцер ҳамда Давлат хавфсизлик қўмитаси (КГБ) ходими ўлими тўғрисида интернетда шарҳ қолдирган 136 нафар киши ҳибсга олинди. “Беларусь тергов қўмитаси” телеграм-канали тарқатган маълумотга мувофиқ, бу кишилар давлат хизматчисини ҳақоратлаш ва низо қўзғатишга оид жиноят иши бўйича гумонланувчи бўлиб ҳисобланади.
Бир ҳафта муқаддам Беларусда шу каби айблов билан 50 чоғли киши ҳибс этилгани маълум бўлганди. Қўлга олишлар IT-ширкати ходими бўлган 31 ёшли Андрей Зельцер ҳамда Беларусь Давлат хавфсизлик қўмитаси зобити ҳалок бўлгани айтилаётган отишма видеоёзувига доир изоҳлар билан боғлиқ бўлган.
Видеоёзув 28 сентябрь куни ёйинланган. Ўшанда Беларусь ҳуқуқ-тартибот идоралари воқеа бўйича ўз талқинини илгари сурган, яъни Зельцер, кучишлатар ходимлар унинг Минскдаги уйида терроризмга алоқадор одамлар яширинган деган шубҳа билан эшигини бузиб киришганида уларга ўқ узганини иддао қилишган.
Беларусдаги қатор шарҳловчилар видеонинг ҳақиқийлигига шубҳа қилиб, уни “кўзбўямачилик” деб ҳисобламоқда. Айни пайтда Беларусь мухолифатининг таниқли вакиллари видеони реал воқеа сифатида изоҳлаганлар. Хусусан, муҳожирликда юрган президентликка собиқ номзод Валерий Цепкало юз берган воқеада Лукашенко режимини айблаган, Зельцернинг хатти-ҳаракатларини эса қораламаган ва “у ўз мисолида қандай курашиш кераклигини кўрсатган”ини айтган. Бу сўзлари учун Беларусда Цепкалога қарши яна бир жиноят иши очилган.