Би-би-си рус хизмати журналисти Андрей Захаров Москвада ўз ортидан “мисли кўрилмаган” кузатув бўлаётганини сезиб қолганидан сўнг Россиядан чиқиб кетган. Бу ҳақда унинг ўзи нашрнинг YouTube-канали орқали ёйинланган видеода гапириб берди.
А. Захаров ҳозирда Лондонда юрибди. “Кузатувнинг нима билан боғлиқ бўлгани ҳозирча тушунарсиз – бу менинг “хорижий агент” деб тан олинганим билан боғлиқми ёки британиялик ҳамкасблар билан биргаликда ҳозирлаганим Evil Corp гуруҳига кирувчи ҳакерлар тўғрисидаги материал биланми”, деган Захаров.
Россия Адлия вазирлиги Андрей Захаровни шу йил октябрь ойи бошида “ОАВ-хорижий агент” реестрига киритган эди. Мазкур реестрга шу пайтгача 100 дан зиёд ташкилот ва киши номи киритилган.
Би-би-си Россия расмийларининг А. Захаровни “ОАВ-хорижий агент” реестрига киритишга оид қарорини қатъиян рад этишини билдирган.