Қирғизистон пойтахти Бишкекда куч ишлатар тузилма ходимлари Россия элчихонаси олдида “Путинга қарши” норозилик акциясига чиққан уч эркакни қўлга олишган. Бу ҳақда Озодликнинг қирғиз хизмати хабар қилди.
Элчихона биносига олдига биринчи бўлиб бишкеклик фаол Ондуруш Токтонасиров келган – у Россия президенти Владимир Путин хатти-ҳаракатларига қарши бир кишилик пикет ўтказмоқчи бўлган.
Токтонасировга кўра, элчихона олдида унга яна икки киши келиб қўшилган. 24.kg нашри қайдича, улардан бири Россия фуқароси Владимир Кайданович бўлиб чиққан. У дипломатик идора биноси ёнига “Йўқолсин уруш. Путин, кет!” деган плакатни кўтариб келган.
Акциянинг учинчи иштирокчиси эса боткенлик Омурбек Кангелдиев бўлган. Уларнинг учови ҳам қўлга олиниб, милиция бўлимига олиб кетилган.
Пировардида, ҳуқуқ фаоли Динара Ошурахунованинг маълум қилишича, Токтонасиров ва Кангелдиев қўйиб юборилган, Кайдановичга эса ички ишлар ходими талабларига бўйсунмаганлик айблови қўйилган. Мазкур модда бўйича унга 3 минг сўм (тақрибан 37 АҚШ доллари) миқдорида жарима солиниши мумкин.