АҚШ давлат котиби Энтони Блинкен 1 март куни G20 саммитида иштирок этиш учун Тошкентдан Ҳиндистонга учиб кетди. Тошкентга 28 февраль куни келган Блинкен 1 март куни президент Шавкат Мирзиёев ва ташқи ишлар вазири вазифасини бажарувчи Бахтиёр Саидов билан музокара ўтказган эди.
Вашингтон расмийси Тошкентда журналистлар саволларига жавоб берар экан, Нукусдаги 1-2 июль воқеаларида куч ишлатар органлар томонидан инсон ҳуқуқларини бузилганига оид маълумотлар очиқ ва шаффоф тергов қилиниши муҳим эканини айтди.
Нукус воқеаларида 21 киши ҳалок бўлгани, 243 киши яралангани хабар қилинган эди. Ҳуқуқ-тартибот тузилмалари томонидан камида 500 киши ҳибс қилинган.
Блинкен Тошкентда берган интервьюсида президент Мирзиёев билан сўз ва матбуот эркинлиги масаласини ҳам муҳокама қилгани ни айтган.
“Кучли, фаол ва барча ресурсларга эга маҳаллий оммавий ахборот воситаларининг мавжудлиги биз бугун, шу жумладан, президент [Ўзбекистон Шавкат Мирзиёев] билан муҳокама қилган масалалардан биридир. Хусусан, Россиядан ёки бошқа манбалардан келаётган дезинформацияга қарши курашиш учун”, - деб иқтибос келтирган “Газета уз” Блинкен сўзларидан.
Блинкен Остонада 28 февраль куни Ўзбекистон, Қозоғистон, Қирғизистон, Тожикистон ва Туркманистон ташқи ишлар вазирлари иштирокида ўтган С5+1 саммитидан сўнг 28 февраль куни Тошкентга келганди. У давлат котиби бўлганидан бери илк марта Ўзбекистонга ташриф қилди.