Британия полицияси Ливерпул шаҳридаги аёллар касалхонаси олдида содир этилган портлашга алоқадорликда гумонланган уч кишини қўлга олди. Мазкур портлашда бир киши ҳалок бўлган ва яна бир киши жароҳатланган.
14 ноябрь куни касалхона олдида такси хизматига қарашли автомашинани портлатганликда гумонланиб қўлга олинганлар 29, 26 ва 21 ёшдаги эркаклар экани маълум қилинди. Уларга террорчилик моддаси асосида айблов билдирилиши кутилмоқда.
Полиция қўлга олинганларнинг шахси ва уларга оид бошқа маълумотларни ҳамда тафсилотларни жамоатчиликка ошкор қилмади.
Портлаш ортидан аёллар касалхонасига кириш ва чиқиш номаълум муддатга чекланди. Беморлар эса бошқа касалхоналарга кўчирилди.