Чехия Хавфсизлик ва ахборот хизмати мамлакат Ташқи ишлар вазирлигида ишлаган юқори лавозимли ходимни фош қилди. Бунинг ортидан дипломат вазирликдаги ишидан бўшатилган.
Deník N сайти хабарига кўра, махфий ҳужжатлар билан ишлаш ҳуқуқи бўлган дипломат Россия Ташқи разведка хизмати билан ҳамкорлик қилган.
У 1990 йиллардан бери ТИВ тизимида фаолият юритган, вазирлик марказий аппаратидан ташқари хориждаги бир неча элчихонада ишлаган.
Нашрнинг аноним манбаси Россия разведкаси чехиялик дипломатни ёллашда унинг пулга ўчлиги ва аёлларга суяги йўқлигидан фойдаланганини иддао қилган.
Қайд этилишича, Хавфсизлик ва ахборот хизмати дипломатнинг Россия махсус хизмати билан алоқада эканини бир неча йил аввал аниқлаган ҳамда ўтган бир неча йил давомида уни кузатиб юрган. 2022 йилнинг биринчи ярмида вазиятдан ТИВ раҳбари Ян Липавский ва бош вазир Петр Фиала хабардор қилинган.
Липавский кўрилган чоралар натижасида мазкур ходим ҳозирда ТИВда ишламаётганини тасдиқлаган, бироқ бошқа тафсилотларни очиқлаган эмас.