Европа Иттифоқи Россияга қарши жорий қилинган санкциялар муддатини узайтирди. Бу ҳақда ЕИ кенгаши сайтида маълумот тарқатилди.
“Кенгаш Россия иқтисодиётининг айрим соҳаларига йўналтирилган чеклов тадбирлари муддатини 2021 йил 31 июлигача узайтириш ҳақида қарор қабул қилди. Бу санкциялар Россиянинг Украинадаги вазиятни беқарорлаштириш ҳаракатларига жавобан 2014 йилда киритилганди”, дейилган баёнотда.
Қарор Россия томонидан Минск шартномаси тўлалигича бажарилмаётгани туфайли қабул қилингани айтилмоқда.
Санкциялар билан Россиянинг айрим банклари ва ширкатлари учун ЕИ капитали бирламчи ва иккиламчи бозорларига кириш чекланган ҳамда Россиянинг молия муассасаларига молиявий ёрдам бериш тақиқланган. Шунингдек, мудофаа жиҳозларини бевосита ёки билвосита импорт, экспорт қилиш ва ўтказиб бериш тақиқланган.
Европа Иттифоқининг Россияга нисбатан санкциялари 2014 йилдан бери амал қилиб келмоқда. Чеклов муддати ҳар ярим йилда узайтириб келинади. Санкция рўйхати вақти-вақти билан тўлдирилиб турилади.
Қрим аннексияси туфайли Россияга нисбатан санкцияларнинг алоҳида пакети қабул қилинган. Бу чоралар Европа Иттифоқида фаолият юритаётган ширкатлар ва шахсларга нисбатан қўлланилади. Чекловлар яриморол иқтисодиётига (шу жумладан туристик хизматлар кўрсатишга) сармоя ётқизишни тақиқлашни ҳам ўз ичига олади. Ўз навбатида, Қримда жойлашган корхоналар Европа Иттифоқига ўз маҳсулоти ёки табиий бойликларни импорт қилолмайди.
Россия 2014 йилнинг март ойида Украина таркибига кирган Қрим яриморолини аннексия қилиб олган. Халқаро ҳамжамият Қрим аннексиясини ноқонуний, деб топган. Ғарб мамлакатлари эса Россияга қарши санкциялар жорий қилган. Кремль Қрим аннексия қилинганини рад этиб, буни “тарихий адолатнинг тикланиши” дея баҳолаб келади.