АҚШ Штаб бошлиқлари бирлашган қўмитаси раиси, генерал Марк Милли Америка қўшинларининг Афғонистондан чиқиб кетишини “стратегик мағлубият” деб баҳолади, айни пайтда у эвакуация жараёни яхши ташкил қилинганини таъкидлади.
Бу мулоҳазани генерал АҚШ Сенатида Америка контингентининг Афғонистондан олиб чиқиб кетилишига бағишланган тингловларда билдирган.
Тингловлар парламент аъзолари сўрови билан ўтказилган бўлиб, уларнинг аксарияти қўшинларнинг шошилинч олиб чиқиб кетилгани ва Афғонистондан америкаликлар ҳамда улар билан ҳамкорлик қилган афғон фуқароларининг бетартиб кўчирилганини танқид қилган.
Генерал Миллига кўра, АҚШ ҳарбийлари афғон ҳукумати ва хавфсизлик кучлари кутилмаганда оғир аҳволда қолиши эҳтимолини кўзда тутиб, Афғонистонда камида 2,5 минг кишилик қўшин қолдиришни тавсия қилишган.
Бу сўзлар республикачи сенатор Дэн Салливаннинг кескин муносабат билдиришига сабаб бўлган, у президент Байден ҳарбийлардан бунақа тавсия олмаганини айтганини эслатган.
Марк Милли АҚШ афғон армиясининг жанговар ҳозирлиги ва унинг Америка дастагисиз ҳаракат қилиш лаёқатини тўғри баҳолай олмаганини тан олган.
Генералга Хитой армияси штаби бошлиғи билан икки марта телефонда сўзлашгани ҳақида ҳам саволлар берилган. Шундай суҳбатлардан бирида у хитойлик ҳамкасбини АҚШ Хитойга зарба бермоқчи эмаслигига ишонтирган. Танқидчилар генерални президент Трампга маълум қилмасдан, хитойлик ҳарбий билан сўзлашиб, субординация қоидаларини бузганликда айблаганлар. Милли сўзлашувлар мудофаа вазири, давлат котиби ва бошқа идоралар вакиллари билан келишилган ҳолда ўтказилганини тушунтирган.
Сенатда Америка қўшинларининг Афғонистонни тарк этишига бағишланган тингловлар давом этмоқда. Унда генерал Миллидан ташқари, мудофаа вазири Ллойд Остин ҳамда АҚШ Марказий қўмондонлиги раҳбари Франк Маккензи чиқиш қилишмоқда.