Очлик эълон қилган Грузия собиқ президенти Михаил Саакашвили қамоқ касалхонасида адвокатлар билан учрашувдан сўнг ҳушидан кетди. Бу ҳақда журналистларга унинг адвокати Бека Басилая маълум қилган.
Адвокатга кўра, ҳушини йўқотганидан кейин сиёсатчи хонадан замбилда олиб чиқилган. Кейинроқ Басилая собиқ президентнинг аҳволи барқарорлашганини билдирган. “Тиббий хулоса беролмайман, аммо у жуда оғир аҳволда эди”, деган адвокат.
Саакашвили 1 октябрдан бери очлик сақламоқда. Собиқ президент дастлаб уни жиноий таъқиб этишни тўхтатишни талаб қилган. Ҳозир эса қамоқхона касалхонасидан фуқаровий клиникага кўчиришларини талаб қилмоқда.
Сиёсатчи Грузияга қайтиб келганида ҳибсга олинган эди – у иккита жиноят иши бўйича сиртдан суд қилинган. Яқинда яна бир жиноят иши бўйича суд бошланди ва унда ҳам Саакашвили айбланувчи ўлароқ жалб қилинган.
Мухолифат унинг таъқиб этилиши фақат сиёсий сабаблар билан боғлиқ, дея урғуламоқда. Саакашвилини дастаклаб парламентнинг 10 депутати очлик эълон қилган, улардан бири мухолифатдаги “Ягона миллий ҳаракат” етакчисидир.
Европа Иттифоқининг бир қанча депутатлари, Латвия ва Украинанинг собиқ президентлари Саакашвилини озод этишга чақиришган. Собиқ президентни озод этиш учун унинг афв этилганлиги ҳақидаги фармонга амалдаги давлат раҳбари Саломе Зурабишвили имзо чекиши керак. Бироқ у бу ишни қилмаслигини бир неча бор айтган.