Грузиянинг собиқ президенти Михаил Саакашвили Рустави шаҳридаги қамоқхонадан Тбилисидаги 18-қамоқхона касалхонасига кўчирилди.
Грузия махсус пенитенциар хизмати маълумотига кўра, мазкур қарор Саакашвилининг соғлиғи янада ёмонлашишининг олдини олиш мақсадида ҳамда унинг ҳаёти учун хавф ортгани туфайли қабул қилинган.
“Биз бу борада жамоатчиликка босқичма-босқич равишда қўшимча маълумот бериб борамиз”, дейилган хабарномада.
Аввалроқ Саакашвили қамоқхонадан вертолётда олиб кетилгани ҳақида сиёсатчининг онаси Гиули Аласания маълум қилган эди. “Яқинда уни зирҳли автомобилларда олиб чиқиб кетишган, кейин устимиздан вертолёт учиб ўтди, бироқ қаёққа олиб кетишганини билмайман”, дея иқтибос келтирган аёлнинг сўзларидан Озодликнинг грузин хизмати.
Михаил Саакашвили Грузияга Украинадан маҳаллий сайловлар олдидан 29 сентябрь куни қайтганди. У фуқароларни 2 октябрь куни бўлиб ўтажак сайловда қатнашиб, кейинги куни Тбилисида ўтказилажак акцияга йиғилишга чақирган эди. Бироқ у 1 октябрь куни аввал очилган жиноят ишлари асосида қўлга олинган. Саакашвили ҳибсга олиниши биланоқ очлик эълон қилган.
Сиёсатчи яқиндаги мурожаатида “душманларга қасдма-қасдига ўлмаслиги”ни ва мамлакатда навбатдан ташқари парламент сайловлари ўтказилишига эришажагини билдирган. Шунингдек, у ўз тарафдорларини мухолифат мағлуб бўлган маҳаллий сайловлар натижасига қарши норозилик акцияларини ўтказишни давом эттиришга чақирган.
Шифокорлар ва адвокатларга кўра, Саакашвили сувсиз очлик эълон қилган эмас: сиёсатчи вақти-вақти билан суюқлик ичиб, дори-дармонлар қабул қилиб турибди. У сақланаётган қамоқхонада доимий равишда реанимобиль навбатчилик қилиб турган. Бундан ташқари, Грузиянинг собиқ президенти врач назоратидан ўтиб турган. Бироқ буларнинг ҳаммаси Саакашвилининг соғлиғи жойидалиги ва унинг учун ҳеч қанақа хавф-хатар йўқлигини англатмайди. Сиёсатчининг адвокати Бека Басилия Саакашвили очлик акциясини бошлаганидан бери ўтган бир ойдан кўпроқ муддат ичида унинг хотираси заифлаша бошлагани, баъзи нарсаларни эслолмаётгани, шунинг учун ҳам у билан мулоқот қилиш қийинлашганини билдирган. Аввалроқ врачлар ва Саакашвилининг адвокатлари бир неча бор уни қамоқхонадан фуқаролар ётадиган клиникага кўчиришни талаб қилишган.