Индонезия президенти Жоко Видодо Москвада Владимир Путин билан музокаралар чоғида унга Украина президенти Владимир Зеленскийнинг “бир хабари”ни етказган. Бу ҳақда Видодонинг ўзи матбуотга маълум қилди.
Индонезия раҳбари хабар мазмунини очиқламаган, бироқ Россия ва Украина ўртасидаги урушни тўхтатиш учун бажонидил воситачилик қилажагини билдирган. Видодо Путин билан музокаралардан бир кун аввал, яъни 29 июнь куни Украина президенти Владимир Зеленский билан учрашган эди.
Kedatangan menemui Presiden Volodymyr Zelenskyy adalah wujud kepedulian masyarakat Indonesia terhadap situasi di Ukraina.Spirit perdamaian jangan pernah luntur. Saya menawarkan diri untuk membawa pesan dari Presiden Zelenskyy untuk Presiden Putin yang akan saya kunjungi pula. pic.twitter.com/TvyNeruQDZ
— Joko Widodo (@jokowi) June 30, 2022
Путин билан Видодонинг учрашуви 30 июнь куни Кремлда бўлиб ўтган. ОАВлар қайдича, Индонезия президентини кутиб оларкан, Путин уни Россияда кўришдан мамнунлигини ва “бу унинг мамлакатга илк ташрифи эканини билиши”ни айтган. Ҳолбуки, Путин билан Видодо 2016 йил майида Сочида учрашган эдилар. Ўшанда ҳам Россия президенти Видодога уни қабул қилишдан жуда мамнун эканини изҳор этган.
Кечаги музокаралар чоғида Путин Видодога Индонезияга қишлоқ хўжалиги ўғитлари етказиб бериш давом эттирилишига ваъда берган, бу савдо алоқалари уруш туфайли оқсаб қолган эди. Айни пайтда Россия раҳбари Ғарб мамлакатларини глобал озиқ-овқат инқирозини юзага келтиришни истаётганликда айблаган.
Индонезия ҳозирда G20 (“Катта йигирматалик”) гуруҳига бошчилик қилмоқда. Жорий йилнинг ноябрида Индонезиянинг Бали оролида G20 саммити ўтказилиши белгиланган. Анжуманга Владимир Зеленский ҳам таклиф этилган. Бироқ у Владимир Путин ҳам саммитда бўлиши эҳтимолини назарда тутиб, ўз иштироки “у ерда кимлар бўлишига” боғлиқлигини урғулаган. Россия G20 гуруҳининг доимий аъзоси бўлиб ҳисобланади.
Аввалроқ Жоко Видодо “Катта йигирматалик”нинг Балидаги саммитида Владимир Путин шахсан қатнашишини истисно этиб, Россия президенти билан мулоқот видеоалоқа орқали ташкил қилиниши билдирган эди.