Иордания шимоли шарқида, Сурия чегараси яқинига жойлаштирилган АҚШ ҳарбий кучлари позициясига дрон билан ҳужум қилингани оқибатида уч нафар америкалик аскар ҳалок бўлди.
Бу ҳақда 28 январь куни маълум қилган АҚШ президенти Жо Байден ҳужум учун масъулиятни Эрон дастаклаётган жангарилар гуруҳига юклади.
“Ҳозирда мазкур ҳужум юзасидан маълумотлар тўплаётганимизга қарамай, биламизки, у Эрон томонидан дастакланаётган, Сурия ва Ироқда фаолият юритаётган радикал гуруҳлар томонидан амалга оширилган”, – деди Байден.
АҚШ президенти ҳужум қилганлар Вашингтон “қачон ва қандай усул билан жазолашни маъқул кўрса, ўша пайтда” жавобгарликка тортилишини таъкидлади.
АҚШ Марказий қўмондонлигининг билдиришича, Иорданиядаги ҳарбий базага ҳужум оқибатида уч аскар ўлган ва 15 аскар яраланган.
Ғазода ҲАМАС-Исроил уруши бошланганидан кейин минтақадаги АҚШ ҳарбий базаларига қатор ҳужумлар қилингани ҳақида хабарлар берилган. Бироқ бу ҳужумларда аскарлар ҳалок бўлгани ҳақида билдирилмаган.
Иорданияда дрон ҳужуми оқибатида АҚШнинг уч аскари ҳалок бўлди
Иорданиянинг Сурия билан чегараси.