Италия президенти Сержо Маттарелла бош вазир Марио Драгининг истеъфосини қабул қилгани йўқ.
Аввалроқ Драги бош вазирликдан кетмоқчи эканини билдирган. Бунга сабаб ўлароқ у ҳукмрон коалиция партияларидан бири бўлмиш “Беш юлдуз ҳаракати”нинг сенатда ҳукуматга ишонч билдиришга оид овоз беришда иштирок этишдан бош тортганини кўрсатган. Бу билан улар расман парламент кўпчилигидан чиққанларини намоён қилганлар. Драги фикрича, коалицияни ультиматумлар билан тутиб туришнинг маъноси йўқ.
Италия парламентининг юқори палатасида 14 июль куни овоз бериш жараёни бўлиб ўтиб, унда депутатлар Драги бошчилигидаги ҳукуматга ишонч билдиришларини тасдиқлашган эди. Овоз бериш чоғида сенаторлардан 172 нафари ҳукуматга ишонч билдириш қарорини ёқлаган, 39 нафари эса қарши чиққан. “Беш юлдуз ҳаракати” партияси овоз беришда иштирок этган эмас.
Драги Италия ҳукуматини 2021 йилнинг февраль ойидан бери бошқариб келмоқда.