Озод Европа/Озодлик радиоси директорлар кенгаши Жейми Флайни медиакорпорация президенти этиб тайинлади. Унинг жорий йил 16 февралида ишга киришиши кутилмоқда. Флай 2020 йил июнида Глобал медиа бўйича АҚШ агентлигининг (USAGM) раҳбари Майкл Пэк қарори билан Озодлик президенти лавозимидан бўшатилганди.
“Мен Озодлик радиосига бундай мураккаб даврда раҳбарлик қилиш учун медиакорпорация президенти лавозимига қайтганимдан мамнунман”, деган Жейми Флай.
У, пандемия ва бошқа хатарларга қарамай, маълумотга энг кўп эҳтиёжи бўлган кишиларга ҳаққоний ва холис хабар етказиб бераётган журналистлар ва ходимлар билан фахрланишини урғулаган.
“Улар билан қайта бир сафда туриб фаолият юритиш мен учун шараф бўлади”, дея билдирган Флай.
Жейми Флай Озодлик радиоси президенти лавозимига дастлаб 2019 йил августида тайинланганди. Ўтган йил июнида у истеъфога кетган.
Ташқи сиёсат бўйича мутахассис бўлган Флай Герман Маршалл жамғармаси ва АҚШ Конгрессида ишлаган, АҚШ Миллий хавфсизлик кенгаши ва Мудофаа вазирлигида турли раҳбарлик лавозимларини эгаллаб келган.
Озодлик радиоси президенти вазифасида ишлаган пайтда Жейми Флай қатор мамлакатлар расмийларини журналистлар ҳуқуқларини бузгани ҳамда ОАВ фаолияти билан боғлиқ қонунчиликни кескинлаштиргани учун бир неча бор танқид қилган.
Озод Европа/Озодлик радиоси Шарқий, Марказий ва Жанубий-шарқий Европа, Кавказ, Марказий ва Жанубий Осиёдаги 23 мамлакатдаги аудитория учун турли платформаларда 27 тилда ахборот тарқатади. Медиакорпорация аудиторияси 40 миллион кишидан ошади.