ЛДПР партияси асосчиси, Давлат думасининг 8 та чақириқдаги депутати Владимир Жириновский 76 ёшида вафот этди. Бу ҳақда Давлат думаси спикери Вячеслав Володин 6 апрель куни билдирди.
Жириновский февраль бошида COVID-19 ва пневмония ташхислари билан касалхонага ётқизилган эди. Жириновский миллатчилик ва аксиламерика руҳидаги чиқишлари билан танилган.
Жириновский Қозоғистоннинг Олмаота шаҳрида туғилган. Унинг онаси ва отаси бу шаҳарга Иккинчи жаҳон уруши пайтида эвакуация қилинганди. У Москва давлат университетининг турк тили ва адабиёти факультетида ўқиган.
“Проект” нашри ўтказган журналистик суриштирувда курсдошлари Жириновскийнинг ўша пайтда КГБ томонидан ёлланган бўлишини эҳтимолдан соқит этмасликлари айтилган.
Журналистик суриштирувда таъкидланишича, 1969 йилда Жириновский Туркияга стажировкага жўнатилган, аммо у ерда ҳибсга олинган. Жириновский бу воқеани эслар экан, Туркияда Ленин акси туширилган значокларни сотгани учун ушланганини билдирган.
Озодлик радиоси рус хизматининг ёзишича, Жириновскийнинг Туркияда ушланиши унинг дипломатик карьерага бўлган умидини барбод қилган. Шундан сўнг у юриспруденцияни ўргана бошлаган.
Расмий биографияга мувофиқ Жириносвский Давлат телерадио қўмитасида, СССР Ташқи иқтисодий алоқалар давлат қўмитасида, Тинчликни ҳимоя қилиш СССР қўмитасида стажировка қилган.
Шундан сўнг у Касаба уюшмалари ҳаракати Олий мактабининг хорижлик талабалар билан ишлаш деканати ходими бўлган, кейинроқ эса СССР Адлия вазирлигининг хорижий адлия коллегиясига ишга ўтган.
“Проект” нашри ўтказган журналистик суриштирувда таъкидланишича, Совет Иттифоқи даврида бу каби соҳаларда асосан “махсус хизматлар билан тиғиз алоқда бўлган” шахслар ишлаган.
Владимир Жириновский Биринчи канал эфирида Украинани 31 декабрдан 1 январга ўтар кечаси бомбардимон қилишга чақирган эди.
Жириновский Россиянинг Марказий Осиё давлатларини субъектлари ўлароқ бита федерал округга жамлашга чақирган эди.
Мустақил давлатлар суверенитетига дахл қилувчи чақириқлари борлигига қарамасдан, Жириновский 2018 йилда Ўзбекистонга келганида, Бухоро вилоятининг ўша пайтдаги ҳокими Ўктам Барноев унинг шарафига қўйлар сўйдириб, тантанали кутиб олган эди.