АҚШ президенти Жо Байден 12 июль куни Куба ҳукуматини одамларнинг талабларига қулоқ тутишга ва уларнинг сўровларига жавоб беришга чақирди.
“Кубаликлар авторитар режимдан эркинлик талаб қилмоқдалар. Биз Куба ҳукуматини, халқ овозини ўчириш ҳаракати чоғида зўравонликдан тийилишга чақирамиз”, деган Жо Байден. Аввалроқ эълон қилинган расмий баёнотда АҚШ озодлик талаб қилиб чиққан кубаликларни қўллаб-қувватлаши билдирилган эди.
Турмуш даражасининг кескин тушиб кетиши, озиқ-овқат ва энг зарур маҳсулотлар тақчиллиги, қимматчилик ҳамда соғлиқни сақлаш тизимининг коронавирус пандемияси олдида лаёқатсизлиги туфайли 11 июль куни Кубанинг қатор шаҳарларида келиб чиққан кўп минг кишилик намойишлар АҚШда акс-садо бермоқда.
Кубалик миллионлаб муҳожир истиқомат қиладиган Флорида штатида Куба халқини дастаклаб намойишлар ўтказилган.
Америкалик айрим депутатлар Байден маъмуриятини Куба ҳукуматига нисбатан қаттиққўл бўлишга чақирган. “Ҳозирда кубаликлар озодлик учун курашда бизнинг дастагимизга ҳар қачонгидан ҳам муҳтож”, деган сенатор Марко Рубио.
Сенатор Линдси Грэм эса “Twitter”даги саҳифасида “Президент Байден, сиз Кубага кераксиз. Ўртадан ғойиб бўлиб қолманг”, деб ёзган.
President Biden, freedom in #Cuba needs you now! Don’t be AWOL.https://t.co/hWgxptw0nJ
— Lindsey Graham (@LindseyGrahamSC) July 12, 2021
Cubalex ҳуқуқбонлик ташкилоти маълумотига кўра, 100 дан ортиқ намойишчи, мустақил журналистлар ва фаоллар Куба хавфсизлик хизматлари томонидан ҳибсга олинган. 12 июль куни Ҳавана кўчаларида полиция кучайтирилган тартибда навбатчилик қилган.
Америкалик кузатувчилар қайдича, Байден маъмуриятининг Кубага оид стратегияси ҳали шаклланиш босқичида. Жо Байден сайловолди кампанияси чоғида 1962 йили жорий қилинган иқтисодий эмбарго натижасида узилиб қолган савдо-иқтисодий алоқаларни қисман тиклаган Барак Обама стратегиясига қайтишга ваъда берган эди.
Дональд Трамп президентлиги йилларида аксари чекловлар қайтарилиб, Куба яна терроризмга ҳомийлик қилувчи мамлакатлар рўйхатига тиркалган. Трамп жорий қилган тақиқлар ҳамон ўз кучида.
Эмбаргога қарши бўлганлар бундай чора-тадбирлар Куба ҳукуматининг қатағонларни кучайтириши учун асос бўлишдан бошқасига ярамайди, деб ҳисобласалар, эмбарго тарафдорлари Куба билан савдо-сотиқ авторитар коммунистик режимни мустаҳкамлайди, деб ишонишади.
Кубадаги оммавий норозилик, экспертлар фикрича, катта эҳтимол билан Байден маъмуриятини Куба ҳукуматига нисбатан кескинроқ позицияни тутишга мажбур этади.