Россиянинг Ейск шаҳридаги тўққиз қаватли уйга Су-34 ҳарбий учоғи қулаши ортидан ҳалок бўлганлар сони 15 нафарга етган. Бу ҳақда Краснодар ўлкаси губернаторининг ўринбосари Анна Минькова маълум қилди.
Мулозимага кўра, танасининг 80 фоизи куйгани натижасида касалхонага олиб келинган 51 ёшли бемор вафот этган. Қурбонлар орасида уч нафар бола ҳам бор.
Авиаҳалокат туфайли 19 нафар одам тан жароҳати олган, улардан тўрт нафари реанимацияда ётибди. Ҳодиса жойида олиб борилаётган қутқарув ишлари ниҳоясига етган.
17 октябрь оқшомида Ейскдаги тураржой биносига ҳарбий учоқ қулаган. Учувчилар ҳисоботига кўра, авиаҳалокатга ҳавога кўтарилиш вақтида учоқ двигателларидан бирининг ёниб кетгани сабаб бўлган.
Фожиа ортидан Ейск туманида 19 октябргача мотам эълон қилинган. Минтақа расмийлари қурбонларнинг дафн маросими харажатлари қопланишини, уларнинг яқинларига эса бир миллион рублдан пул тўланишини билдиришган. Жароҳатланганларга ҳам моддий ёрдам ваъда қилинган.