Куба расмийлари 13 июль куни йирик аксилҳукумат намойишларидан кейин намойишчилар ва полиция ўртасида содир бўлган тўқнашувларда бир киши нобуд бўлганини тасдиқлади.
Куба Ички ишлар вазирлиги 12 июль куни Ҳавана четидаги муниципалитетда 36 ёшли эркак вафот этгани билдирган. Расмий баёнотга кўра, тўқнашувлар чоғида кўплаб одам ҳибсга олинган ва яраланган, тан жароҳати олганлар орасида икки нафар полициячи ҳам бор.
Расмийлар намойишчиларни уйларни талон қилганлик, айрим жойларга ўт қўйганлик, электр узатиш тармоқларига шикаст етказганликда айбламоқда. Баёнотда норозилар полициячилар ва фуқароларга пичоқ, тошлар ва бошқа ашёлар ёрдамида ҳужум қилгани иддао этилади.
Шу йилнинг 11 июль куни Кубадаги иқтисодий инқироз, COVID-19 инфекциясининг шиддат билан тарқалаётгани ҳамда озиқ-овқат ва дори-дармон етишмаётганидан норози бўлган фуқаролар намойишларга чиққан эдилар. Бу сўнгги йилларда Кубада кузатилган аксилҳукумат намойишларининг энг йириги бўлган.
Куба ҳукумати намойишлар келиб чиқиши кубалик бўлган америкаликлар томонидан ижтимоий тармоқлар орқали уюштирилганини иддао қилган.