Франция президенти Эммануэль Макрон Марказий Африка республикаси (МАР) президенти Фостен-Арканж Туадера мамлакатда “конлар ва шу билан бирга сиёсий тизимни эгаллаб олаётган” Вагнер гуруҳи гаровида қолган одам эканини билдирган. Макрон бу фикрни Le Journal du Dimanche газетасига берган интервьюсида айтган.
Франция президентига кўра, Вагнер гуруҳи иштирокчилари Марказий Африка республикасида аксилфранцуз кайфиятидан фойдаланмоқда. Сўнгги йилларда Африка мамлакатларида Франция таъсири сусайгани ортидан бошқа мамлакатлар, айниқса, Хитой, Россия ва Туркия таъсири ортиб бормоқда.
Халқаро Франция радиоси хабарига кўра, МАР расмийлари бизнесмен Евгений Пригожинга алоқадорлиги айтилган “Вагнер ХҲШ” билан эмас, Россия Мудофаа вазирлиги билан ҳамкорлик қилаётганлари, бу ҳамкорлик БМТ Хавфсизлик кенгаши назорати остида қўлланилаётган икки томонлама шартнома доирасида амалга оширилаётганини иддао қилмоқдалар.
Марказий Африка республикасида ўтган пайшанба куни содир бўлган портлашда россиялик уч нафар инструктор ва маҳаллий полициячилардан икки нафари ҳалок бўлган, бир неча киши жароҳатланганди. Бу ҳақда 30 май куни AFP агентлиги ҳукуматдаги манбалардан олинган маълумотга таянган ҳолда хабар қилган.