Беларусь расмийлари шу йил 20 декабридан фуқароларга чегара-ўтказиш масканлари орқали мамлакатдан чиқишга вақтинча тақиқ жорий этди. Бунга расмий сабаб ўлароқ “коронавирус инфекцияси тарқалишига йўл қўймаслик” кўрсатилмоқда.
Беларусь ҳукумати қарорида мамлакатдан чиқишга фақат фавқулодда ҳолатлардагина рухсат берилиши айтилган. Тақиқ дипломатик ва хизмат паспортларига эга бўлганлар, расмий делегация аъзолари, халқаро йўналишда юк ташийдиган ҳайдовчилар, учоқ, кема ва поезд экипажлари ва бошқа айрим тоифадаги кишиларга тегишли эмас. Беларусликлар мамлакатдан фақат яқин қариндоши оғир хаста бўлган ёки вафот этган тақдирда ҳамда даволаниш учун сафар мақсадини тасдиқловчи ҳужжатларни кўрсатганидан кейин чиқиб кетиши мумкин. Шунингдек, хорижий мамлакатларда ўқийдиган талабаларга ҳам бундай рухсат берилади.
Шу йил 5 ноябрида Александр Лукашенко Беларусни аввалроқ тарк этган фуқароларни мамлакатга киритмаслик ҳақида топшириқ берган. Ўшанда Лукашенко нафақат “ёт паспортга эга бўлган одамлар”, балки “оғир пайтда мамлакат ташқарисига чиқиб кетган ақлли беларуслар” ҳам мамлакатга киритилмаслигини билдирган.
Сўнгги ойларда юзлаб беларуслик сиёсий бошпана илинжида қўшни мамлакатларга қочиб ўтган. Биргина Польшада, ОАВ маълумотларига кўра, ҳозирги пайтда 500 га яқин беларуслик бор. Август ойи охирида Беларусда норозилик чиқишлари тўхтамаётганига гувоҳ бўлган Польша, Литва, Латвия ва Украина расмийлари беларуслик фуқароларни соддалаштирилган тартибда қабул қилишга тайёр эканларини билдирганлар.
Беларусда норозилик намойишлари 9 августдаги президентлик сайлови ортидан МСК Александр Лукашенкони сайлов ғолиби, деб эълон қилганидан кейин бошланиб кетган ва шу кунгача ҳам тингани йўқ. Намойишчилар кетма-кетига олти марта президентлик курсисини эгаллаган Лукашенконинг истеъфосини ҳамда қайта сайлов ўтказилишини талаб қилмоқдалар. Уларга кўра, сайловда мисли кўрилмаган сохталаштиришлар бўлган ва намойишлар иштирокчиларига хавфсизлик кучлари ходимлари томонидан аёвсиз муносабатда бўлинган.
Ҳуқуқ фаоллари ўтган 4 ой ичида 30 мингга яқин беларуслик қатағон чиғириғидан ўтгани, калтаклангани ва таҳдидга дучор бўлганини айтмоқдалар.
Беларусь Соғлиқни сақлаш вазирлиги маълумотига кўра, шу пайтгача мамлакатда 152 мингдан зиёд одам коронавирусга чалинган, COVID-19 қурбонлари сони эса 1230 нафарга етган. Пандемия бошида расмийлар карантин чекловлари киритишни исташмаган, Александр Лукашенко эса одамларга қўлни тез-тез ювиб, хоккей ўйнашни тавсия қилган. Ўша пайтда Лукашенко COVID-19 у қадар ваҳимали хасталик эмаслигини, республика аҳолисининг 97 фоизи бу касалликни асоратсиз бошдан кечираётганини қайд этганди.