Минск вилоят судида Польшада рўйхатга олинган NEXTA каналининг журналистлари Роман Протасевич, Степан Путило ва Ян Рудикка нисбатан жараён бошланди. Жараёнда фақат Роман Протасевич иштирок этмоқда, қолган икки айбланувчи мамлакатни тарк этган.
Давлатга қарашли БелТа агентлигининг ёзишича, уч журналист камида 1586 та жиноятни содир этганликда айбланмоқда. Улар орасида “ижтимоий нафратни қўзитиш”, “оммавий тартибсизликларни уюштириш”, “давлат ҳокимиятни ағдариш, террор уюштиришга очиқ чақириш”, “экстремистик ташкилот ташкил этиш ва уни бошқариш”, “президентга тухмат ва унинг обрўсига путр етказиш” каби оғир айбловлар ҳам бор.
БелТА агентлиги Протасевич ўзига қўйилган айбларни тан олгани ҳақида ёзди. 16 февралдаги суд жараёнида у собиқ ҳамкасблари билан ҳозирда алоқада эмаслигини ва уларнинг ким эканини “аллақчон тушунгани”ни айтди.
Мухолиф қарашдаги NEXTA телеграм канали 2020 йилнинг августида ўтган президентлик сайловида Александр Лукашенконинг ғалаба қилганига шубҳаланган норозиларнинг омммавий митингларини фаол ёритиб келган. Ўтган йилнинг апрелида Беларусь Олий суди телеграм канални “террорчи ташкилот” сифатида эълон қилган.
Роман Протасевич ва унинг севган қизи София Сапега 2021 йилнинг 23 майида Афинадан Вильнюсга парвоз қилган Ryanair авиаширкатига қарашли самолёт Минскка мажбуран қўндирилган пайтда қўлга олинган эди. Ўшанда Сапега олти йилга қамалганди.
Степан Путило айни пайтда Польшада яшайди ва NEXTA каналини юритишда давом этмоқда. У 2020 йилда халқаро ҳимояга олинган ва 2021 йилда сиёсий қочқин сифатида тан олинган.