Молдова россияпарастларнинг тартибсизлик уюштириш режаси барбод қилинганини билдирди

Молдова полицияси 12 март куни оммавий тартибсизликларни уюштириш бўйича махсус тайёргарликдан ўтказилган россияпараст гуруҳларнинг режаси барбод қилинганини билдирди.

Полициянинг таъкидлашича, тартибсизликлар Кишинёвда мамлакатнинг ғарбпараст янги ҳукуматига қарши ўтказилган митингда амалга оширилиши лозим эди. Озодлик радиоси молдован хизматининг билдиришича, 12 март куни Кишенёвда мухолифатдаги “Шор” партияси митинг ўтказган. Митинг қатнашчилари президент Майя Сандуга қарши чақириқларни айтганлар ва электр энергияси қимматлигидан нолиганлар.

Митинг бошланганига тахминан бир соат бўлганида норозилар ва полиция ўртасида тўқнашувлар бўлгани айтилмоқда. Полиция норозиларнинг Ҳукумат уйига ўтишига тўсқинлик қилган. Норозилар полиция тўсиғини ёриб ўтишга ҳаракат қилган.

“Интерфакс” агентлигининг ёзишича, музокаралардан сўнг полиция ҳукумат уйига “шор” партиясидан сайланган уч депутатни киритган. Улар норозилар талаблари битилган резолюцияни ҳукумат вакилига топширганлар.

Озодлик радиоси молдован хизматининг полицияга таяниб ёзишича, митингда 50 норози қўлга олинган, улардан 20 нафари балоғатга етмаган болалардир. Молдова полицияси раҳбари Виорел Чернэуцянунинг айтишича, махсус агент “диверсантлар” гуруҳига киришга муваффақ бўлган. Агент бу гуруҳ Россия фуқароларидан иборат эканини аниқлаган. Тартибсизликни уюштирганларнинг ҳар бирига 10 минг доллардан ҳақ тўлаш ваъда қилинган.

Москва ҳозирча бу хабарга муносабат билдирмади.

Ўтган ойда президент Санду Россия Молдова ҳудудида тартибсизликларни уюштиришни режалаштираётгани тўғрисида разведка маълумотлари борлиги тўғрисида баёнот берган эди. Сандуга кўра, шундай йўл билан Москва Молдованинг Европа билан интеграция бўлишига тўсқинлик қилмоқчи ва мамлакатдан Украинага қарши урушда фойдаланмоқчи.

Россия Ташқи ишлар вазирлиги Сандунинг бу баёнотини асоссиз деб баҳолаган ва Украинани Молдовани “Россияга қарши урушга жалб қилишга уринаётганликда” айблаган.