Молдованинг илк президенти Мирча Снегур 83 ёшида вафот этган. Бу ҳақда республиканинг биринчи парламенти депутати Константин Тампиза маълум қилди.
Снегур Молдовани 1990 йил 3 сентябридан 1997 йил 15 январигача бошқарган. Унинг президентлиги даврида қисқа вақт ичида Молдова мустақиллигини жаҳондаги 130 дан зиёд мамлакат тан олган.
Айни пайтда Снегур давлат раҳбари бўлган пайтда Молдовада иқтисодий кўрсаткичлар кескин ортга кетган, кўплаб илмий ва лойиҳавий институтлар ёпилган, ишсизлик мисли кўрилмаган даражада ортган, таълим соҳасида жиддий оқсоқликлар кузатилган.
1996 йили бўлиб ўтган президент сайловидаги мағлубиятидан сўнг Мирча Снегур Молдова уйғониш ва ҳамжиҳатлик партияси раиси этиб сайланган. Бир неча йил фаолият юритган мазкур партия 2003 йилда “Бизнинг Молдова” альянси таркибига қўшилиб кетган.
Мирча Снегур Кишинёвдаги марказий қабристонда дафн этилиши айтилмоқда.