Владимир Путин ва Александр Лукашенко Россия билан Беларуснинг сиёсий интеграциясини муҳокама қилишмаган. Бу ҳақда икки сиёсатчининг 9 сентябрь куни Москвада бўлиб ўтган саммити якунларига бағишланган матбуот анжуманида Россия президенти маълум қилди.
Путинга кўра, ушбу масалага қайтиш учун “аввало иқтисодий замин ҳозирлаш лозим”.
Лукашенконинг айтишича, Москва ва Минск сиёсий интеграция борасида бартараф этиб бўлмас зиддиятларга дуч келишганидан сўнг кўп йиллардан бери бу масалани муҳокама қилаётгани йўқ. “Зарур бўлса, биз мавзуга қайтамиз. Энг муҳими, буни халқларимизнинг ўзлари хоҳлаши керак”, деган Лукашенко.
Унинг қўшимча қилишича, Путин иккиси “Европа Иттифоқи ва СССР хатоларини ҳисобга олишган” ва интеграция бўйича ишни “томдан эмас, пойдевордан бошлаш”га қарор қилишган.
Лукашенко, шунингдек, икки мамлакат ягона валютани ҳам муҳокама қилмаётганини айтган. Унга кўра, икки давлат марказий банкларининг раҳбарлари бу ғояни номақбул деб топганлар. Айни чоғда ягона эмиссия маркази бўйича музокаралар бўляпти, аммо бу масалада тил топиша олганлари йўқ.
Путиннинг билдиришича, Москвадаги саммитда томонлар “умумий макроиқтисодий сиёсат” юритишга келишганлар. 28 та интеграция дастури, жумладан нефть ва энергетика бозорларини бирлаштириш ҳамда солиқ сиёсатини уйғунлаштириш дастурлари ўзаро маъқулланган.
Бирлашиш ва уйғунлаштириш лойиҳаларининг тафсилотлари ва моҳияти юзасидан матбуот анжуманида изоҳ берилган эмас. Ҳужжатларни кейинроқ эълон қилишга ваъда берилган. Мазкур келишувлар икки мамлакат ҳукуматлари вакилларининг 10 август куни Минскда ўтказиш режаланган йиғилишида ҳам муҳокама қилинади.
2000 йилда Москва ва Минск Иттифоқ давлатини ташкил қилиш тўғрисидаги шартномани ратификация қилган. Ҳужжат асосан декларатив тусда бўлиб, амалда ҳозирча жиддий ўзгаришларга олиб келган эмас.