Мухолифатчи Алексей Навальнийнинг 20 ёшли қизи Дарья Навальная инсон ҳуқуқлари учун курашувчи фаолларнинг Женева форумида чиқиш қилди.
Форум ҳар йили БМТ Инсон ҳуқуқлари кенгашининг навбатдаги сессияси арафасида йиғилади. Бу йил Кенгашнинг 47-сессияси Женевада 21 июндан 15 июлгача ўтказилиши белгиланган.
Дарья Навальная ҳозирда ҳибсда сақланаётган отаси номидан унга берилган “Жасорат” мукофотини қабул қилиб олди. Ўз чиқишида Алексей Навальнийнинг қизи, жумладан, қуйидагиларни айтди:
“Сиз бугун қаршингизда мени эмас, отамни кўришингиз керак эди, аммо у Россия қамоғида ётибди. У бутун умрини коррупцияга қарши курашга, сўз эркинлиги, сиёсий қарашларни ифода этиш эркинлиги, норозилик билдириш ва сайловларда иштирок этиш ҳуқуқи каби инсон ҳуқуқ ва эркинликларини ҳимоя қилишга бағишлади”.
Дарья Навальнаяга кўра, санаб ўтилган ушбу жуда муҳим қадриятлар Россияда мавжуд эмас.
Форум ташкилотчилари Алексей Навальнийнинг сафдоши Леонид Волковга йўлланган мактубда мухолифатчига унинг “адолат ва инсон ҳақларини ҳимоя қилишдаги фавқулодда жасорати учун” мазкур мукофотни топширишга қарор қилинганини урғулаганлар.
Алексей Навальний ўтган йил августида Навальний беҳуш ҳолда, заҳарланиш аломатлари билан Омск касалхонасига ётқизилган ва кўп ўтмай даволаниш учун Германияга жўнатилган.
Немис ҳарбий лабораторияси экспертлари мухолифатчи организмида “Новичок” гуруҳига мансуб жанговар заҳарловчи модда асоратини топганлар. Россия ҳукумати нафақат Навальнийнинг заҳарланишига алоқаси борлигини, ҳатто унинг заҳарланганини ҳам инкор этган.
Шу йил 17 январида Навальний Германиядан Россияга қайтгани заҳоти Шереметево аэропортида қўлга олинган. ФЖИЭХ Навальний “Ив Роше” иши бўйича синов муддатини бир неча марта бузганини иддао қилиб, шартли қамоқ муддатини ҳақиқийси билан алмаштиришни талаб қилган.
2 февраль куни Москванинг Симонов тумани суди ФЖИЭХнинг талабини қондириб, мухолифатчига ҳақиқий қамоқ жазосини тайинлаган. Суд қарорига мувофиқ, сиёсатчи 2 йилу 8 ойни қамоқда ўтказиши лозим.