Россия қозоқ нефти экспортининг асосий йўналишларидан бири бўлган Каспий қувурлари консорциуми (КҚК) фаолиятини бир ойга тўхтатиб қўйганидан бир кун ўтиб, яъни 7 июль куни Қозоғистон президенти Қасим-Жомарт Тоқаев нефть етказиб беришни диверсификация қилишни муҳим вазифа деб атади.
Шу муносабат билан у ҳукуматга Транскаспий йўналишининг энг мақбул вариантини ишлаб чиқиш ва иккита нефть қувурининг ўтказиш қобилиятини ошириш бўйича топшириқ берди, деб хабар қилди Оқўрда матбуот хизмати.
Тоқаев, шунингдек, ҳукуматга Каспий денгизидаги қозоқ портларини замонавий ва илғор хабларга айлантириш тўғрисида кўрсатма берди.
5 июль куни Новороссийск шаҳар Приморск туман суди нефть тўкилишига қарши кураш режаси бузилганини баҳона қилиб, КҚК фаолиятини 6 июлдан бошлаб 30 кунга тўхтатиб қўйган эди. Қозоғистон нефтнинг катта қисмини мазкур қувур орқали экспорт қилади.
Россия Украинага уруш очганидан сўнг ўтган бир неча ой ичида Москва турли сабабларни баҳона қилиб, Қозоғистоннинг Каспий қувурлари консорциуми орқали ғарбга нефть экспорт қилишига тўсқинлик қилиб келмоқда.