Қирғизистоннинг Боткен вилояти Қадамжой шаҳрида Ўзбекистон томонидан молиялаштирилаётган юқумли касалликлар шифохонаси қурилиши поёнига етиб боряпти. Қирғизистон ҳукумати матбуот хизмати маълумотига кўра, шифохона яқин 5-7 кун ичида фойдаланишга топширилади.
Шифохона икки корпусдан иборат бўлиб, 214 та ўринга эга. 7 декабрь куни Қадамжойдаги қурилишни Қирғизистон бош вазири вазифасини бажарувчи Артём Новиков бориб кўрган ва қурувчилар тезкор суръатда ишлаётганини қайд этган. Шу билан бирга у қурилишда барча меъёрларга риоя қилиш ҳамда қурувчиларга зарур бўлган шароитни яратиб бериш муҳимлигини таъкидлаган.
Аввалроқ Ўзбекистон Қирғизистонга тез қуриладиган конструкциялардан мамлакатнинг икки ерида – Бишкек ва Қадамжойда тиббиёт муассасалари қуришда кўмаклашишга қарор қилганди. Ўзбекистон коронавирус эпидемиясига қарши кураш учун қўшни мамлакатга бир неча партия гуманитар ёрдам юкини ҳам йўллаган.