Жорий йилнинг ўтган 11 ойи ичида Ўзбекистон ўз қўшниси бўлган Туркманистондан 1,03 миллиард долларлик табиий газ харид қилган. Бу ҳақда “Туркменгаз” давлат концерни маълумот тарқатди.
Туркманистонлик газчилар қайдича, Ўзбекистон бу йил газ экспорт қилинган давлатлар орасида тўртинчи ўринни эгаллаган. Табиий газ импорти бўйича биринчи ўринни Хитой ($9,28 млрд), иккинчи ўринни Россия ($3,5 млрд), учинчи ўринни эса Мьянма ($1,29 млрд) эгаллаган. Туркманистондан роппа-роса 1 миллиард долларлик газ экспорт қилган Қозоғистон бешинчи ўринда қолган.
Ўзбекистон қиш мавсумида қўшимча 1,5 млрд куб метр табиий газ етказиб бериш бўйича яқинда Туркманистон билан шартнома имзолагани ҳақида Озодлик аввалроқ хабар қилган эди.
Туркманистон президенти Сердар Бердимуҳамедов ва Ўзбекистон президенти администрацияси раҳбари Сардор Умурзоқов томонидан 12 декабрь куни Ашхободда имзоланган мазкур шартномага мувофиқ, Туркманистон ўз қўшнисига кунлик қўшимча 20 миллион куб метр табиий газ етказиб бериш мажбуриятини ўз зиммасига олган.
Йилига 52 млрд куб метрга яқин газ қазиб оладиган Ўзбекистон бунгача хориждан кунига 15 миллион куб метр атрофида табиий газ импорт қилиб келган.
Туркманистон билан тузилган шартнома Ўзбекистонда “газ танқислигини қоплаш” истаги билан изоҳланган.