Олмаотада тартибсизликларда иштирок этишда гумон қилиниб, қўлга олинган қирғизистонлик мусиқачи Викрам Рўзахунов Бишкекка қайтди.
Рўзахуновни кутиб олишга чиққан кишилардан бири Озодликка у Қирғизистон консулининг автомобилида “Ақ Жол” назорат-ўтиш маскани орқали қирғиз-қозоқ чегарасидан ўтганини айтган.
9 январь куни Qazaqstan Ұлттық Телеарнасы телеканали яқинда мамлакатда юз берган тартибсизликларда иштирок этишда гумон қилиниб, қўлга олинган эркак “Қирғизистондан Қозоғистонга митингларда қатнашиш учун келган”ига иқрор бўлгани акс этган видеони намойиш этганди. Тутқуннинг исми кўрсатилмаган бўлса-да, қирғизистонликлар мамлакатда машҳур жаз мусиқачиси ва пианиночи Викрам Рўзахуновни таниб қолишган.
Қирғизистон ИИВга кўра, Рўзахунов Олмаотага тез-тез гастролга бориб турган, Янги йил арафасида эса концерт дастурлари ўтказиш учун у ерга таклиф этилган ва 2 январь куни Олмаотага учиб кетган. Видеода мусиқачи 1 январда номаълум одамлар унга қўнғироқ қилиб, 90 минг танга (200 доллар) таклиф этишганини, 2 январда унга Олмаотага чипта олиб беришганини, уни Тожикистон ва Ўзбекистондан келганлар билан битта квартирага жойлаштиришганини айтган.
МХДҚ раиси Қамчибек Ташиев Қозоғистоннинг Бишкекдаги элчихонаси олдида ўтказилган митингда Рўзахунов Қирғизистонда бирон тартибсизлик ва норозилик чиқишларида иштирок этмаганини уқтирган.
10 январь куни Қирғизистон Адлия вазирлиги Бош прокуратурага Викрам Рўзахуновга нисбатан қийноқлар қўллангани факти бўйича жиноят иши қўзғатишга оид сўров киритган. Қирғизистон ТИВ эса Қозоғистоннинг фавқулодда ва мухтор элчиси Рапиль Жобишевга мусиқачининг қўлга олиниши муносабати билан норозилик нотасини топширган.