Жаҳоннинг асосий нефть қазиб чиқарувчи ширкатлари қазиб чиқариш ҳажмини оширишга келишиб олишди. Мазкур битим дунёда нефть нархининг бу ойда сўнгги олти йил ичида энг юқори кўрсаткичга етишига олиб келган можароларга чек қўяди.
18 июль куни имзоланган шартномага мувофиқ, OPEC+ гуруҳига аъзо мамлакатлар август ойидан бошлаб нефть қазиб чиқариш ҳажмини кунига 400 минг баррелга ошириш мажбуриятини олган.
Дастлаб Саудия Арабистони ва Бирлашган Араб Амирликлари ўз қазиб чиқариш ҳажмлари бўйича муросага келган эди. Бу кўп томонлама келишувга эришиш имкониятини берди, дея хабар қилган “Нью-Йорк Таймс” ва “Рейтер”.
Россия мансуб OPEC+ гуруҳи ўтган йили, пандемия туфайли талаб камайиши муносабати билан нефть қазиб чиқаришни суткасига 10 миллион баррелга камайтирган эди.
OPEC картели сўнгги пайтларда дунё иқтисодиёти жонланишига қараб нефть қазиб чиқаришни суткасига 2,2 миллион баррелга оширган. Бироқ бу нархлар кўтарилишини ва қазиб чиқариш ҳажмининг янада ўсишини тўхтата олмаган. АҚШда нефть баҳоси баррелига 77 долларга етган — бу 2014 йилдан бери энг юқори нарх ҳисобланади.
Янги битимга мувофиқ, Россия нефть қазиб чиқаришни ҳозирги 11 миллион баррелдан 2022 йил майда 11,5 миллион баррелга етказади.