Оқ уйда 1 сентябрь куни АҚШ президенти Жо Байден Украина раҳбари Володимир Зеленский билан учрашди. Бу Зеленскийнинг Оқ уйга Украина президенти сифатида илк ташрифидир.
Джо Байден & Владимир ЗеленскийПартнерство между странами крепчает и станет еще крепче, - заявил Байден pic.twitter.com/Y3EejY0wVJ
— Канал Дом (@dom_kanal) September 1, 2021
“Яккама якка” форматдаги муҳокамалардан олдин икки мамлакат делегацияларининг кенгайтирилган таркибдаги музокаралари бўлиб ўтган.
Украина президенти АҚШга ўз мамлакатининг ҳудудий яхлитлигини дастаклагани ва Вашингтонга таклиф учун миннатдорлик билдирган.
Зеленскийга кўра, у АҚШ билан хавфсизлик соҳасида ҳамкорлик мустаҳкамланишидан умидвор бўлиб, Украинанинг НАТОдаги роли ҳамда АҚШнинг Украина шарқидаги можарони тинч йўл билан ҳал қилиш бўйича музокаралардаги ўрнини Байден билан муҳокама қилишни истайди.
Украина раҳбари босиб олинган Қрим, “ДХР” ва “ЛХР” ҳудудларида, шунингдек Россиянинг ўзида қўлга олинган ва қамоққа ҳукм этилган одамларни озод этишда кўмак сўраган. Киев Вашингтонга берган рўйхатда 450 нафарга яқин кишининг исми келтирилган, дея хабар қилди “Немис тўлқини”.
Зеленский, шунингдек, Украинанинг энергия хавфсизлиги ва Россиянинг “Шимолий оқим-2” газ қувури билан боғлиқ муаммолар ҳамда иқтисодий соҳадаги ҳамкорлик масалалари ҳам уни қизиқтиришини айтган. У Вашингтоннинг Россиядан Германияга Болтиқ денгизи тубидан, Украинани четлаб ўтган газ қувури қурилишини тўхтата олмаганини “қўпол сиёсий хато” деб, мазкур лойиҳанинг ўзини эса “Москва қўлидаги қудратли геосиёсий қурол” деб атаган.
Жо Байден ўз навбатида, Украинага яна бир марта ташриф буюришдан мамнун бўлишини билдирган, шунингдек Қўшма Штатлар “Россия агрессияси қаршисида Украина суверенитетига” қатъий тарафдор бўлиб қолажагини урғулаган. Шу билан бирга, Байден Вашингтон собиқ совет ўлкаси бўлган Украинада демократияни мустаҳкамлашга ёрдам берувчи теранроқ ислоҳотлар ўтказилишини кутаётганига шама қилган.
Икки мамлакатнинг истиқболдаги стратегик ҳамкорлигига оид қўшма баёнотда айтилишича, “Украина ўз мустақиллигини тиклаганидан бери орадан ўттиз йил ўтиб, Украина ва Қўшма Штатлар ҳар қачонгидан ҳам мустаҳкам алоқаларга эга”. Ҳужжат матни Владимир Зеленский сайтида эълон қилинган.
Вашингтонга ташриф ва Оқ уйдаги музокаралар биринчи галда Москвага Украина Қўшма Штатлар томонидан жиддий дастакланиши ҳақида мужда йўллаш мақсадида Зеленский маъмуриятининг Байден билан учрашувга эришиш йўлидаги давомли саъй-ҳаракатлари кульминацияси ўлароқ кўрилмоқда.