Озарбайжонда 6 март куни Toplum TV мустақил интернет-телеканалига алоқадор бўлган тўққиз нафар журналист ҳамда камида уч нафар сиёсий фаол қўлга олинган. Бу Toplum таҳририяти ва қўлга олинганларнинг уйларида ўтказилган тинтувдан кейин содир бўлган.
Тинтувлар ва қўлга олишлар ҳақида Озодликнинг озарбайжон хизмати ва Би-Би-Сига қўлга олинганларнинг яқинлари хабар беришган. Озарбайжон Ички ишлар вазирлиги бу борада изоҳ берган эмас.
Бокудаги Toplum TV таҳририятида тинтув 6 март куни эрталаб бошланган. Журналистларнинг яқинлари уларни полиция олиб кетгани, шундан бери улар билан алоқа йўқлигини айтишган. Toplum TV бош муҳаррири Хадижа Исмаил таъқиб учун нима сабаб бўлганини билмаслиги ва таҳририятга қарши иш қўзғатиш учун ҳеч қанақа юридик асос йўқлигини билдирган.
“Биз ҳеч қанақа жиноятга аралашган эмасмиз, қонунга хилоф бўлган ҳеч қандай хатти-ҳаракат ҳам содир этганимиз йўқ. Бу шунчаки мамлакатдаги қатағон тўлқинида галдаги қадам, холос”, деган у.
Озодликнинг озарбайжон хизмати Toplum ходими Фарид Исмайилов тинтувдан сўнг ўз уйида қўлга олингани ҳақида хабар қилган. Тинтув чоғида, Фариднинг яқинларига кўра, 3000 евродан кўпроқ пул олиб кетилган. Исмайилов бу пуллар унга тегишли эмаслигини айтган. Тинтув фуқаролик жамияти фаоли Акиф Гурбанов хонадонида ҳам ўтказилган, у ҳам полиция бўлимига олиб кетилган. Полиция ҳар иккала уйда ўтказилган тинтувда Гурбанов ва Исмайиловнинг адвокатлари иштирок этишига рухсат берган эмас.
Мустақил интернет-телевидение бўлган Toplum TV бошқа материаллар қаторида Озарбайжонда инсон ҳуқуқларининг бузилиши ва коррупция бўйича суриштирувларни ёйинлаб боради.
Қўлга олинган уч фаол — Акиф Гурбанов, Араз Алиев ва Руслан Иззетли “III Республика платформаси” номли жамоатчилик ҳаракати аъзолари бўлиб ҳисобланишади. Ҳаракат Озарбайжонда президент ҳокимиятининг чекланиши ва мамлакатнинг парламент бошқарувига ўтиши ғоясини илгари суриб келади. Кеча ҳаракат офисида ҳам тинтув ўтказилган.
Ўтган йил охирида ҳам Озарбайжонда ўнга яқин журналист ҳибсга олинган эди. Уларнинг кўпчилиги “Абзас Медиа” нашри ходимлари бўлган. Мазкур иш бўйича ҳибсга олишлар 2023 йилнинг 20 ноябрида бошланган эди.