Россиянинг Петербург шаҳрида зиёфат чоғида қариндошини пичоқлаб қўйган ўзбекистонлик муҳожир олти йиллик қамоқ жазосига ҳукм қилинди.
Мойка78 нашри хабарига кўра, Петербург суди Россия Жиноят кодексининг 105-моддаси 1-қисми (қотиллик) бўйича айбдор, деб топилган М. Н.га нисбатан ҳукм чиқарган.
Суд маълумотига кўра, 19 июндан 20 июнга ўтар кечаси Невский туманининг Антонов-Овсеенко кўчасида жойлашган 1/2-уйда маст аҳволда бўлган судланувчи Ш. билан жанжал чоғида унга икки марта пичоқ урган. Жабрланувчи оғир аҳволда касалхона етказилган, бироқ врачлар унинг ҳаётини сақлаб қололмаган – Ш. 2 июль куни жон таслим қилган.
М.Н. айбига тўла иқрор бўлган ва кўрсатма беришдан бош торган. Суд унга нисбатан олти йилга озодликдан маҳрум этиш бўйича қарор чиқарган. Судланган ўзбекистонлик жазони қаттиқ режимли колонияда ўтайдиган бўлган.