Петербург суди маҳаллий рассом Александра Сколиченкони жорий йилнинг 31 майигача тергов ҳибсхонасида сақлаш ҳақида қарор чиқарди. Бу ҳақда Озодликнинг Север.Реалии лойиҳаси Сколиченконинг дўстидан олинган маълумотга таянган ҳолда хабар қилди.
Судья бу қарорга рассом аёл бирор жойда, “шу жумладан Украина ҳудудида” яшириниши мумкинлигини тахмин қилган ҳолда келган.
Сколиченко россиялик ҳарбийлар тўғрисида “фейк” тарқатганликда айбланмоқда. У 31 март куни дўкондаги нархномаларни урушга қарши ёзувлар билан алмаштириб чиққан.
11 апрель куни рассом аёлнинг уйида тинтув ўтказилган, кейин уни ички ишлар бўлимига олиб кетишиб, тунги соат 3 гача сўроқ қилишган. Терговчи Сколиченко ёзган ёзувларни “қасдан уйдирилган ёлғон” деб топган ва бу иш сиёсий душманлик сабабли амалга оширилган, деган хулосага келган.
Рассомнинг айби исботланган тақдирда Сколиченко 5 йилдан 10 йилгача қамалиши мумкин.