АҚШнинг Pfizer фармацевтика ширкати БМТ шафеълигидаги Тиббиёт патентлари пули – ТПП билан ҳамкорликда қашшоқ давлатларга коронавирусга қарши арзон дори етказиб бериш бўйича шартномани имзолади.
Ширкатнинг 16 ноябрда билдиришича, шартномага асосан Pfizer коронавирусга самарали дорини ишлаб чиқади ва уни ишлаб чиқариш лицензиясини ТППга ҳадя қилади. ТПП томонидан ишлаб чиқарилган доридан Pfizer ҳеч қандай улуш олмайди. Бу эса дорининг арзон нархда бўлишини кафолатлайди.
Ширкат бундай йўл билан жаҳон аҳолисининг деярли тенг ярми яшайдиган 95 та қашшоқ давлат аҳолисини коронавирусга қарши дори билан таъминламоқчи.
Ноябрь ойининг бошларида Pfizer ўзининг янги коронавирус таблеткаси Paxlovid 89 фоиз самарали эканлигини эълон қилган эди. Pfizer Paxlovid таблеткасидан фойдаланишга рухсат олиш учун ҳужжат тайёрлаётгани айтилган.
Pfizer 11 ноябрда Paxlovid таблеткасини Ўзбекистонда рўйхатдан ўтказиш учун Интеллектуал мулк агентлигига талабнома киритган эди.
Pfizer ўтган йилнинг ноябрида BioNTech билан ҳамкорликда коронавирусга қарши ўз вакцинасини ишлаб чиққан эди.