Польшага иккита ракета тушгани ва бунинг оқибатида икки киши ҳалок бўлгани ортидан Индонезияда ўтаётган G20 саммитига йиғилган давлат лидерлари шошилинч йиғилиш ўтказди.
«Тўлиқ текширув ўтказмагунимизга қадар бирон нарса дейишим қийинроқ, лекин траектория нуқтаи назаридан ракета Россия томонидан отилгани эҳтимоли оз, яна кўрамиз», деди Байден йиғилишда.
АҚШ президенти мазкур воқеа юзасидан текширув давом этаётганини айтди. У Ғарб давлатлари текширувни ўтказишда Польшани қўллаб-қувватлашларини таъкидлади.
Шошилинч йиғилишда АҚШ, Германия, Канада, Нидерландия, Япония, Испания, Италия, Франция ва Британия раҳбарлари иштирок этди. Япониядан ташқари барча давлатлар НАТО аъзоларидир.
Аввалроқ Польша расмийлари мамлакат ҳудудида портлаган ракета Россияда ишлаб чиқарилганини маълум қилган. Польша президенти Анжей Дуда ҳозирча ракеталар айнан Россия томонидан отилгани юзасидан аниқ маълумотлар йўқлигини айтган.
“Ҳозирда бизда ракета ким томонидан отилгани тўғрисида ишонарли далиллар мавжуд эмас. Бу Россия ишлаб чиқарган ракета экани эҳтимолга яқин. Айни пайтда текширув ишлари олиб борилмоқда”, деди Дуда.
15 ноябрда Польшанинг Украина билан чегара яқинида иккита ракета портлаган. Дастлабки маълумотга кўра, икки киши ҳалок бўлган. Associated press агентлигининг АҚШ разведкасининг исми ошкор этилмаган юқори мартабали мулозимларига таяниб хабар беришича, ракеталар Польша ҳудудига учган ва улар Россияга тегишли.
Бу ҳодиса ортидан Польша президенти Анжей Дуда қатор ҳукуматлар раҳбарлари, жумладан, АҚШ президенти Жо Байден билан телефон мулоқоти ўтказди. Суҳбат давомида Жо Байден “АҚШ НАТОдаги иттифоқдошлари билан якдил” эканини айтган ва Польшага ракета портлашларини тергов қилишда кўмак кўрсатишга тайёрлигини билдирган.
Россия Мудофаа вазирлиги рус ракеталарининг Польша ҳудудига қулагани ҳақидаги хабарларни "вазиятни кучайтириш учун атайлаб қилинган провокация" деб атади.