Youtube платформасидаги “Популярная политика” канали бошловчиси Ирина Аллеман Туркияга киритилмади. Турк расмийлари “миллий хавфсизлик учун таҳдид” баҳонаси билан унинг мамлакатга киришини 5 йилга тақиқлаб қўйишган. Бу ҳақда Аллеманнинг ўзи телеграм канали орқали маълум қилди.
Ўтган жума Россия Адлия вазирлиги Аллеманни “хорижий агентлар” реестрига киритишган эди.
Бошловчи Истанбулга 28 май куни учиб борган. Якшанба куни Туркияда президент сайловининг иккинчи босқичи ўтказилган. Аввалроқ Аллеман сайловнинг биринчи босқичи ҳақида репортаж тайёрлаган эди.
Унинг айтишича, паспорт назоратидан ўтиш чоғида бошловчига қўшимча текширувдан ўтиши лозимлиги билдирилган, кейин эса миллий хавфсизликка таҳдид туғдиргани учун унинг Туркияга кириши тақиқлангани ва келган мамлакатига депортация қилиниши айтилган. Бу таҳдид нимадан иборат экани юзасидан Аллеманга изоҳ берилган эмас. У учиб келган мамлакати – Словенияга қайтариб юборилган.
Аллеманнинг айтишича, кириш тақиқига оид ҳужжатларда 25 май санаси қайд этилган. У Туркияга киритилмаганини президент сайловининг биринчи босқичи тўғрисидаги репортажи ёки Россияда “хорижий агентлар” реестрига киритилгани билан алоқадор бўлиши мумкинлигини тахмин қилмоқда. Мазкур репортажда у суҳбатлашган кишилардан кўпи турк мухолифатини дастаклаган эди.
Туркия расмийлари Аллеманнинг мамлакатга киритилмагани юзасидан ҳозиргача бирор изоҳ берганлари йўқ.
Аввалроқ Грузия расмийлари бир неча бор россиялик мухолифатчилар, фаоллар ва журналистларни мамлакатга киритмагани қайд этилган эди. Бироқ Туркияда бу каби ҳолатлар шу пайтгача кузатилган эмас.
Туркиядаги президент сайловининг иккинчи босқичида, расмий маълумотларга кўра, амалдаги президент Эрдўғон ғалаба қозонган.
“Популярная политика” мухолифатчи Алексей Навальний сафдошлари томонидан очилган канал бўлиб, ундаги аксарият материаллар Украинадаги уруш ҳамда Россиядаги норозилик чиқишлари каби мавзуларни қамраган.