Россия президенти Владимир Путин коронавирусга қарши эмланди ва ўзини яхши ҳис қилмоқда. Бу ҳақда 23 март куни ТАСС агентлигига маълум қилган Кремль матбуот котиби Дмитрий Песков чоршанба президент учун тўлақонли иш куни бўлишини билдирди.
Аввалроқ Песков Кремль президент қабул қилган вакцина номини онгли равишда ошкор қилмаётганини таъкидлаб, “Россияда ишлаб чиқилган уччала вакцина ҳам мутлақо ишончли ва самарадор” эканини қўшимча қилган.
Россия президентини эмлаш, ТАСС агентлиги қайдича бошқа мамлакатлардаги айрим сиёсатчиларда кузатилгани каби оммавий тадбир бўлган эмас. Песковга кўра, Путин камера қаршисида эмланишни истамаган. “Бу унга ёқмайди”, деган Путиннинг матбуот котиби.
Путин эмловдан ўтгани ҳақида хабар қилган Би-би-си Кремль томонидан мазкур ҳодисага оид бирорта фотосурат тақдим этилмаганига эътибор қаратди ва ўз сайтига бошқа лидерларнинг вакцина олиш чоғида тушган суратларини жойлади. Мазкур лидерлар орасида Британия бош вазири Борис Жонсон, АҚШ президенти Жо Байден, Венесуэла президенти Николас Мадуро ва бошқалар бор.