Россия президенти Владимир Путин 42 давлат, жумладан АҚШ ҳамда Ватикан раҳбарларини Янги йил билан табриклади. Аммо табрикланганлар орасида Украина президенти Владимир Зеленский ҳамда Грузия раҳбари Саломе Зурабишвили йўқ. Қутлов телеграммаси матни Кремль сайтида эълон қилинган.
Путин, жумладан, Александр Лукашенко, Хитой раҳбари Си Цзиньпин, Германия канцлери Олаф Шольц, Буюк Британия бош вазири Борис Жонсон ҳамда қиролича Елизавета II, Франция президенти Эммануэл Макрон, Туркия президенти Ражаб Тоййиб Эрдўғон, Ўзбекистон президенти Шавкат Мирзиёев, Қозоғистон президенти Қосим-Жўмарт Тоқаев ҳамда мамлакатнинг собиқ раҳбари Нурсултон Назарбоевни табриклаган.
АҚШ президенти Жо Байденга йўлланган табрикда Путин икки мамлакат “умумий муаммоларни енгиб ўтиш учун конструктив ҳамкорлик қилиши” мумкин ва лозимлиги ҳақида ёзган.
Болтиқ мамлакатлари – Литва, Латвия ҳамда Эстония раҳбарлари ҳам Путиннинг табригидан бенасиб қолишган.
Россия президенти ўтган йили ҳам Зеленский билан Зурабишвилини Янги йил билан қутламаган эди.
Хусусан, Украина президенти охирги марта Путиндан 2013 йилда – Қрим аннексиясидан бир йил олдин табрик телеграммаси олган.