Россия президенти Владимир Путин 2024 йилда бўлиб ўтадиган президент сайловида иштирок этишини эълон қилди. Бу ҳақда "Интерфакс" агентлиги хабар қилди.
Президент сайловида номзод ўлароқ қатнашиши ҳақида Путин 8 декабрь куни Кремлда ўтказилган давлат мукофотларини топшириш маросими якунида билдирган. Агентлик хабарига кўра, тадбир меҳмонларидан бири ундан сайловда иштирок этишни сўраган, бунга жавобан Россия президенти рози эканини айтган.
Россияда президент сайлови 2024 йилнинг 17 мартига белгиланган. Россия Марказий сайлов комиссияси сайлов уч кун ичида – 15, 16 ва 17 март кунлари бўлиб ўтишини эълон қилган. Бунгача Россияда президент сайлови фақат бир кунда ўтказиб келинган.
МСК қайдича, сайловда ўз номзодини ўзи кўрсатганлар 27 декабргача, партиялардан номзодлар 1 январгача ҳужжат топширишлари лозим бўлади.
Россия парламентининг юқори палатаси бўлмиш Федерация кенгаши президент сайлови санасини белгиланганидан кейин Коррупцияга қарши кураш фонди (ФБК) «Путинсиз Россия» («Россия без Путина») кампанияси бошлатилишини билдириб, янги йил табриги шаклида мамлакатнинг бир неча шаҳрида билбордлар жойлаштирган. Билбордлардаги QR-код орқали фонд сайтидаги россияликлар Путиндан ташқари истаган номзодга овоз беришга чақирилган матнга чиқилади.
Саккизинчи декабрь куни Москва шаҳар ОАВ ва реклама департаменти реклама тарқатувчиларга билбордларга QR-код жойлаштиришни тақиқлаб, жавобгарликдан огоҳлантирди. Қайд этилишича, мазкур QR-кодлар қонунчилик билан ман қилинган контентга олиб чиқиши мумкин экан. Навальний асос солган Коррупцияга қарши кураш фонди 2021 йили Россияда экстремистик ташкилот деб топилган. Фондга бу мақом берилганидан кейин унга пул ўтказиш ҳамда фонд фаолиятида иштирок этиш Россия расмийлари томонидан жиноят бўлиб ҳисобланади.
Путин 2000 йилдан буён Россия ҳокимияти тепасида. У 2000 ва 2004 йилларда икки марта президент этиб сайланган. Ўша пайтда президентлик муддати тўрт йилни ташкил қиларди. 2008 йили Путин ўша пайтдаги бош вазир билан ўрин алмашган: Дмитрий Медведев президентга айланган, Владимир Путин эса ҳукумат раҳбари лавозимини эгаллаган.
2012 йили Путин учинчи муддатга ўз номзодини қўйган, ўша йилнинг ўзида президентнинг ваколат муддати тўрт йилдан олти йилга узайтирилган. 2018 йилда у тўртинчи марта президент бўлган. 2020 йил ёзида Россияда Конституцияга ўзгартишлар киритилган бўлиб, унга мувофиқ, Путин яна икки марта президентликка ўз номзодини кўрсатиш ва 2036 йилгача ҳокимият тепасида қолиш имкониятини қўлга киритган.