АҚШ ва Россия президентлари Жо Байден ва Владимир Путин жорий йилнинг 7 декабрь куни видеоалоқа орқали музокара олиб боришди.
Суҳбат Тошкент вақти билан 20.00 ларга яқин бошланиб, маълум қилинишича, 2 соату 5 дақиқа давом этган. Мулоқот матбуот учун ёпиқ режимда бўлиб ўтган.
Музокаралар якуни бўйича қўшма баёнотлар берилмаган. Суҳбат тугаганидан сўнг тахминан бир соат ўтиб, Оқ уй сайтида қисқа хабарнома пайдо бўлган.
Унда Байден ва Путин Россия-Америка муносабатларига доир кўплаб масалаларни муҳокама қилишгани айтилган. Хусусан, Байден Россиянинг Украина чегараларида ҳарбий қудратини ошираётгани АҚШ ва унинг Европадаги иттифоқчиларини чуқур хавотирга солаётганини билдириб, ҳарбий эскалация бўлган тақдирда иқтисодий ва бошқа чоралар билан жавоб берилишини англатган.
АҚШ президенти Украина северенитети ва ҳудудий яхлитлигини дастаклашини урғулаб, дипломатик музокараларга қайтишга чақирган. Хабарномага кўра, президентлар ўз жамоаларига ушбу масалани ўрганишда давом этишга кўрсатма беришган. Томонлар стратегик барқарорлик, киберхавфсизлик ва Эронга оид масалаларни ҳам муҳокама қилганлар.
Россия президенти сайтидаги хабарномада музокараларнинг асосий мавзуси Украина бўлгани тасдиқланган, аммо Россия талқинига кўра, гап “Украина ичидаги инқироз” ва “Минск келишувларини бажаришда олдинга силжиш йўқлиги” ҳақида борган. Маълум қилинишича, Путин Украина расмийларини “Донбассга қарши фитна қўзғаш”да айблаган.
Кремль стенограммасида Жо Байден Россияга, агар у “вазиятни кескинлаштиришда давом этгудек бўлса”, янги санкциялар билан таҳдид қилгани тасдиқланган. Путин эса ўз навбатида Россия “НАТОнинг шарққа томон кенгайиши ва Россияга туташ давлатларда зарба берувчи ҳужум қуролларини жойлаштиришини истисно этувчи” кафолатлардан манфаатдорлигини билдирган.
Телекўприк илк бор ҳимояланган видеоалоқа линияси ёрдамида ташкил қилинган. Мулоқот чоғида Путин – Сочида, Байден эса Оқ уйдаги ситуацион хонада бўлган.
Bloomberg агентлиги хабарига кўра, Байден Россия раҳбари билан музокаралар якунларини Европадаги иттифоқчилари билан муҳокама қилмоқчи.