Россия президенти Владимир Путин 13 июль куни Санкт-Петербургда Ғарб билан муносабатлари кескинлашуви манзарасида Москвага тобора кўпроқ суянаётган Беларуснинг авторитар раҳбари Александр Лукашенкони қабул қилди. Бу ҳақда Reuters агентлиги хабар қилди.
Йил бошидан бери тўртинчи марта ўтказилаётган юзма-юз учрашув чоғида Лукашенко “Россия томонидан берилаётган жуда жиддий молиявий дастак учун” Путинга миннатдорлик билдирган. “Биз кредитлар бўйича мажбуриятларимизни бажаришга қаттиқ ҳаракат қиламиз”, дея таъкидлаган Лукашенко. Ўз навбатида Путин Беларусни “ишончли ва барқарор ҳамкор”, деб атаган.
Коронавирус пандемияси туфайли қийинчиликларни бошидан кечираётган Беларусь иқтисодиёти ўтган ойда ЕИнинг янги санкцияларига нишон бўлди. Ryanair учоғи Минскка мажбурий қўндирилиб, беларуслик мухолифатчи блогер Роман Потасевич ҳибсга олинганидан сўнг Брюссель Лукашенко режимига қарши чораларни кучайтиришга қарор қилган.
Янги – тўртинчи санкциялар туркуми Беларусь экспортига, калийли ўғитлар, нефть ва тамаки маҳсулотлари савдосига зарба беради. Шунингдек, Беларусь ҳукумати ва давлат банкларининг Европа Иттифоқи молия бозорига киришига тўсиқ қўйилган.
Аввалги учта санкциялар туркуми ўтган йили президент сайлови натижалари сохталаштирилишига қарши оммавий норозилик ҳаракати Беларусь ҳукумати томонидан шафқатсизлик билан бостирилишига жавоб ўлароқ жорий қилинган.
Чеклов чоралари жорий этилгач, Лукашенко ноқонуний миграцияга қарши курашда ЕИ билан ҳамкорликни тўхтатган.
Ҳозирда Литва ҳукумати расмий Минскни асосан Ироқдан келган юзлаб қочқинни қасддан Литва ҳудуди орқали ЕИга ўтказиб юбораётганликда айбламоқда.