Қозоғистон шу ойдан Россиянинг коронавирусга қарши “Спутник V” вакцинасини ишлаб чиқара бошлашни режалаяпти. Бу ҳақда президент Қасим-Жомарт Тоқаев админстрацияси 4 декабрь куни маълумот тарқатди.
Қозоғистонда Россия вакцинасини ишлаб чиқариш 22 декабрдан бошланади, эмлов даставвал шифокорлар, ўқитувчилар, куч ишлатар идоралар ходимларидан бошланади, дея маълум қилган бош вазир Асқар Мамин мамлакат президентига. У жорий ойда маҳаллий вакцинанинг биринчи партиясини (2 миллион доза) ҳам ишлаб чиқара бошлаш режаланганини қайд этган.
Ноябрь ойи ўрталарида президент Тоқаев Қозоғистонда Россия вакцинасини ишлаб чиқарадиган завод қуриш бўйича президент В. Путин билан келишувга эришгани ҳақида билдирганди.
Сўнгги маълумотларга кўра, Қозоғистонда коронавирус инфекциясини юқтириб олиш бўйича 134 минг 706 та ҳолат қайд этилган. Айни пайтда мамлакатда (1 августдан буён) 42,5 мингдан зиёд кишининг коронавирус билан боғлиқ пневмонияга чалингани айтилган.