Газ қувурига шикаст етказиш иши бўйича ҳибс қилинган қримтатар миллатига мансуб Асан Аҳметов қўлга олиниши билан уни ток билан қийнаганларини айтди.
Аҳметовнинг адвокатга берган савол-жавоб матнига мувофиқ, 3 сентябрь куни унинг уйига қуролли одамлар бостириб киришган, уни қўлини кишанлаб ва кўзларини боғлаб, қандайдир ертўлага олиб кетишган. Ертўлада Аҳметовни курсига скотчлаб қўйган ҳолда узоқ вақт ток билан қийнашган. Шунингдек, ўлдириш билан таҳдид қилишган.
Натижада, Аҳметов айтишича, у видеокамера қаршисида талаб қилинганидек гувоҳлик кўрсатмаси берган. Шундан сўнг уни ФХХнинг Симферополдаги идорасига элтиб, расман сўроқ қилганлар.
“Кўп ҳужжатларга қўл қўйдим, лекин ўзимни жуда ёмон ҳис қилардим, бутун аъзои баданим оғрир, нафасим қисарди”, деган Аҳметов қўлга олинганидан сўнг 10 кун ўтганидан кейингина ҳузурига қўйилган ўз адвокатига.
Маҳбусга кўра, қийноққа солинганидан бери у нафас қисиши хуружидан азоб чекиб келмоқда.
Сентябрь ойи бошида Россия ҳуқуқ-тартибот идоралари Симферополда қримтатарлар уйларида тинтув ўтказиб, беш кишини, жумладан қримтатарлар мажлиси раисининг ўринбосари Наримон Жалоловни қўлга олганди. Асан Аҳметов дохил ҳибсга олинганлардан уч нафари қўпорувчиликда, яъни газ қувурига қасддан шикаст етказганликда айбланган. ФХХ иддаосича, улар август ойи охирида “Қрим газ тармоқлари” ширкатига тегишли газ қувурини украин разведкаси топшириғига кўра портлатишган.
Қримтатарларга нисбатан қатағон сиёсати 2014 йили – яриморол Россия томонидан аннексия қилинганидан сўнг бошланган. Қримтатар миллатига мансуб бўлганларнинг аксарияти Қримнинг Россияга “қўшилиши”га қарши чиққан. Ҳозирда бу халқнинг 100 дан ортиқ вакили қамоқда ёки тергов ҳибсхоналарида сақланмоқда. Уларнинг кўпи экстремизмда айбланган.
2016 йилда Россия ҳукуматига тобе бўлган Қрим Олий суди қримтатарлар мажлисини экстремистик ташкилот деб топган ва Россия ҳудудида унинг фаолиятини тақиқлаган.