Роскомнадзор Google’дан “россиялик фойдаланувчиларга қаратилган таҳдидлар”ни ўз сервисларидан ўчиришни талаб қилди. Бу ҳақда Россия регуляторининг телеграм-каналида маълум қилинган.
“Аввалроқ Google.Translate сервисида экстремистик мазмундаги қоидабузарлик аниқланган эди. Мазкур сервис dear Russians (“қадрли россияликлар”) бирикмаси таржима қилиш учун киритилганда россиялик фойдаланувчиларга уни dead Russians (“ўлик россияликлар”) бирикмаси билан алмаштиришни таклиф қилган. Ҳолбуки бошқа миллатлар номи қўшилган қидириш сўровларида бунақа таклиф бўлмаган”, дейилган Роскомнадзор хабарномасида.
“Интерфакс” хабар беришича, Google ширкати Google.Translate сервисидаги хатоликни бартараф этган.
7 апрель куни Роскомнадзор “Россия қонунчилигини кўп марталаб бузгани учун” Google’га қарши “ахборот бериш ва иқтисодий мазмундаги мажбурлов чоралари” қўлланганини билдирган. “Яндекс” ва Mail.ru қидирув тизимлари Google ресурсларини “Россия қонунларини бузаётган” сайтлар ўлароқ кўрсата бошлаган. Бундан ташқари, Россия ҳукумати Google ва унинг ресурсларини реклама қилишни тақиқлаган.
Шунингдек, Роскомнадзор Google’га қарашли YouTube видеохостинги Украинада ўтказилаётган “ҳарбий амалиёт” ҳақида “фейклар” тарқатилаётган ва “Россия Қуролли кучлари обрўсига путур етказаётган” асосий ахборот майдонларидан бири эканини иддао қилиб келади.