Россия Давлат думаси 16 ноябрь куни мамлакат президентига маршал, генерал ва флот адмирали унвонига эга бўлган ҳарбийларнинг 70 ёшга етганидан кейин ҳам хизмат муддатини узайтириш имконини берувчи қонун лойиҳасини қабул қилди.
Мазкур қонун лойиҳаси шу йил июль ойида президент Путин ташаббуси билан ёзилган. Ҳужжатга тиркалган изоҳ хатида айрим ҳолларда “тажрибалироқ ва юқори малакага эга бўлган” ҳарбийлар билан шартнома муддатини узайтириш зарурати туғилаётгани иддао қилинган.
Аввал Россияда юқори унвонга эга бўлган армия зобитлари билан 70 ёшга киргунга қадаргина шартнома тузиш мумкин эди. Жорий йил бошида Путин истисновий вазиятларда амалдорларни 70 ёшга кирганидан кейин ҳам мансабда қолдиришга имкон берувчи қонунчиликка киритилган ўзгартишларни тасдиқлаганди.
Шундан сўнг президент Шимолий Кавказ федерал округидаги ўз вакили Юрий Чайканинг (у май ойида 70 йиллигини нишонлаган) хизмат муддатини узайтирган. Шунингдек, Россия Федерал хавфсизлик хизматининг (ФСБ) яқинда 70 ёшга кирган раҳбари Александр Бортников ҳам ўз хизматини давом эттирмоқда.