Москва суди “Новая газета” журналисти Виктория Ивлевага 150 минг рубль, ҳуқуқ фаоли Юрий Самодуровга 20 минг рубль миқдорида жарима тайин қилди. Улар митинг уюштириш ва ўтказиш талабларини бузганликда айбланишган.
Жорий йилнинг 20 ноябрь куни Москвадаги Пушкин майдонида “Мемориал” инсон ҳуқуқлари маркази тугатилиши ҳамда сиёсий қатағонга қарши бир нечта якка кишилик пикет бўлиб ўтган. Ўшанда полиция 12 нафар иштирокчини қўлга олган, улар орасида журналист Виктория Ивлева ва ҳуқуқбон Юрий Самодуров ҳам бўлган.
Ивлевага нисбатан кескинроқ жазо қўлланилган, чунки у аввалги норозилик чиқишларида қўлга олинганидан кейин қонунни такроран бузганликда айбланмоқда.
Ноябрь ойида Россия Бош прокуратураси ва Москва прокуратураси “Халқаро Мемориал” ҳамда “Мемориал” инсон ҳуқуқлари марказини хорижий агентлар тўғрисидаги қонунчиликни бузганликда айблаб, уларнинг суд орқали тугатилишини талаб қилиб чиқишган эди. Бу талабга жаҳонда таниқли бўлган бир неча олим, ёзувчи, мусиқачи ва Нобель мукофоти лауреатлари қарши чиқишган.
Москва расмийлари коронавирус пандемияси бошидан бери эпидемиологик чекловларни рўкач қилишиб, шаҳарда норозилик акциялари ўтказишга рухсат бермай келишмоқда. Айни пайтда шаҳарда бошқа оммавий тадбирлар тўсиқсиз ўтказиляпти.