Россия жорий йил 1 ноябридан ўзининг НАТО қароргоҳи қошидаги доимий ваколатхонаси ҳамда НАТОнинг Москвадаги ахборот шуъбаси фаолиятини вақтинча тўхтатади. Бу ҳақда Россия ташқи ишлар вазири Сергей Лавров маълум қилди.
Унинг айтишича, НАТО котибияти Россия томонининг режасидан хабардор. НАТОда Россияга нисбатан саволлар пайдо бўлган тақдирда альянс Россиянинг Бельгиядаги элчисига мурожаат қилиши мумкин. Россия ТИВ раҳбари миссиялар фаолиятининг эҳтимолий тикланиши шартларини очиқламаган.
Лавров мазкур хатти-ҳаракатни Брюсселдаги НАТО қароргоҳи ҳузуридаги Россия доимий ваколатхонасининг 8 ходими аккредитациядан маҳрум этилганига жавоб деб атаган. Ваколатхонадаги россиялик дипломатларнинг умумий сони 20 дан 10 нафарга қисқартирилган. Россия ҳукумати эса энди битта ҳам ходим қолдирмасликка қарор қилган.
Шимолий Атлантика иттифоқи ўз қарорини аккредитациядан маҳрум қилинган дипломатлар Россия махсус хизматлари ходимлари бўлиб, дўстона бўлмаган ишлар билан машғул бўлишгани билан изоҳлаган. Мазкур қарор 6 октябрь куни эълон қилинган, дипломатларга Брюсселни тарк этиш учун ой охиригача муҳлат берилган.
Кремлнинг матбуот котиби Дмитрий Песков ўшанда Москва НАТО билан муносабатлар нормаллашувига ҳамда ўзаро мулоқот қайтадан йўлга қўйилишига ортиқ умид қилмаслигини билдирган.
НАТО вакили эса бунга жавобан Альянс Россияга нисбатан мантиқий изчил сиёсат юритишда давом этишини таъкидлаган. “Биз Россиянинг агрессив ҳаракатларига қарши тийиб туриш ва ҳимояланиш чораларини кучайтирдик, шу билан бирга, конструктив мулоқот учун ҳамиша очиқмиз”, дея баёнот берган у.