Россия Давлат думаси раисининг ўринбосари Борис Чернишев Қизил майдондаги некрополни олиб ташлаш ва Мавзолейда сақланаётган Ленин жасадини кўмишни таклиф қилди.
ЛДПРдан сайланган депутат фикрича, СССР собиқ раҳбарлари ва бошқа совет даврида яшаган машҳур шахсларнинг қабрларини бошқа жойга кўчириш лозим. “Булар бари бўлиши мумкин, лекин Қизил майдонда эмас, савдо дўконлари жойлашган ва одамлар сайр қиладиган жойда қабрлар бўлиши гўрда ётганларга нисбатан ҳурматсизлик”, деган Чернишев РИА Новости билан суҳбатда.
Кремль деворлари тагидаги қабрларни кўчириш ва Ленин жасадини дафн қилиш масаласи рус жамиятида бир неча бор муҳокама қилинган.
Дастлаб, 1989 йилда СССР халқ депутати Юрий Карякин, кейинроқ Россия мухолифати вакиллари Ленин жасадини қабристонга дафн этиш таклифи билан чиқишган.
2020 йил сентябрида Россия меъморлари уюшмаси Владимир Ленин жасадисиз энг яхши Мавзолей концепциясига танлов эълон қилган эди. Бироқ компартия етакчиси Геннадий Зюганов танловни “жирканч иғвогарлик” деб атаб, кескин танқид қилганидан сўнг танлов бекор қилинган.
Россия президенти Владимир Путин Ленин жасадини ерга кўмишга ҳамиша қарши бўлган. У “жамиятда бўлиниш юз бермаслиги учун ушбу масалага эҳтиёткорлик билан ёндашиш”га чақирган.
Ўтган йилнинг ноябрь ойида Москва патриархати митрополити Волоколамский Иларион “пойтахтнинг қоқ марказида мўмиёланган мурда” ётганини “ўтмиш сарқити” деб атаган ва жамият тез орада совет доҳийсини дафн этиш масаласида муросага келишига умид билдирган эди.