Россия Ташқи ишлар вазирлиги Би-би-си телерадиоузатиш корпорациясининг Москвадаги мухбири Сара Рейнсфорднинг ишчи визасини узайтириш илтимосини рад этди. У 31 августга қадар мамлакатни тарк этиши керак, дея хабар қилди Bloomberg.
Дипломатлар бу қарор Россия оммавий ахборот воситаларининг Британия ҳукумати томонидан камситилишига ва россиялик журналистларга виза бериш рад этилишига жавоб эканини иддао қилишмоқда. Аммо Россия ТИВ вакиллари бу ўринда айнан қайси журналистлар назарда тутилганига аниқлик киритишмаган.
Бу сўнгги ўн йилда Россия томонидан британиялик журналистнинг биринчи марта мамлакатдан бадарға қилинишидир. 2011 йилда “The Guardian” газетасининг Москвадаги мухбири Люк Ҳардинг ватанига қайтариб юборилган эди. У “совуқ уруш” тугаганидан бери Россиядан бадарға қилинган илк хорижлик журналист бўлган. 2014 йилда америкалик журналист Дэвид Саттерга Россияга кириш тақиқлаб қўйилган. 2015 йилда Польшанинг “Газета Виборча” нашри мухбири Вацлав Радзиновичга мамлакатни тарк этиш буюрилган.
9 август куни Сара Рейнсфорд Минскда Лукашенконинг катта матбуот конференциясида иштирок этган. Анжуманда у Лукашенкодан Британия санкциялари ҳақида сўраганида, Беларусь президенти ғазаб билан: “Санкцияларингиз билан тиқилиб ўлинг”, дея жавоб берган ва британияликларни “Америка малайлари” деб атаган.
Рейнсфорд Лукашенкога “тинч аҳолига нисбатан шафқатсиз қатағонлардан сўнг ўзингизни легитимлигини йўқотган, деб ҳисоблайсизми?” қабилида савол берганидан сўнг Беларусь президенти журналистнинг ўзини сўроққа тутиб, “Вашингтон иши” бўйича қамоқда азоб чекаётганлар” учун жавоб беришга чақирган. Рейнсфорд америкалик эмас, Буюк Британияданлигини эслатганида эса Лукашенко яна жаҳлга миниб: “Ия, сиз британияликмисиз ҳали? Биз сизларни танимаймиз, танишни истамаймиз ҳам!” дея жавоб қайтарган.
Залда ўтирганлар Лукашенконинг сўзларини гулдирос қарсаклар билан кутиб олишган. Шундан сўнг президент намойиш қатнашчиларидан ҳеч бири қийноққа солинмаганини, булар бари Ғарб матбуотининг уйдирмаси эканини таъкидлаган.
Сара Рейнсфорд Россиядаги фаолиятини 2000-йиллар аввалида бошлаган. У 2004 йил сентябрида Бесландаги мактабда ўқувчилар гаровга олинганида биринчилар қаторида воқеа жойига етиб борган чет эллик журналистдир. Кейинроқ у Истанбул, Мадрид, Ҳавана шаҳарларида ишлаган.